सशस्त्र प्रहरी बलले तराईका जिल्लामा वर्षौंदेखि भइरहने ‘घुमुवा अपरेसन’ फेरि विवादमा तानिएको छ । संगठन प्रमुख राजु अर्यालको नेतृत्वमा लामो समयदेखि चलाइएको यो अपरेसन अन्तर्गत असुलीमा संलग्न भन्दै धनुषाबाट तीन घुमुवाहरूलाई हालै मुख्यालयले तानेको छ ।
बिज्ञापन
धनुषा स्थित सशस्त्र प्रहरी ८ नम्बर गणका एसपी निर्मल खड्काले घुमुवा मनोज यादव र अजय मण्डललाई आर्थिक संकलनमा प्रयोग गरेको भन्ने उजुरीको आधारमा मुख्यालयले उनीहरूलाई छानबिनका लागि काठमाडौँ बोलाएको हो । यसैगरी महिनाथपुरमा प्रस्तावित गुल्मका डिएसपी सिताराम पौडेलद्वारा परिचालित घुमुवा धनञ्जय यादवलाई पनि मुख्यालयले तानेको छ ।
बिज्ञापन
यी घुमुवाहरूले रकम दिने व्यापारीहरूलाई बचाउने, नदिनेहरूमाथि छापा मार्ने, स्थानीय प्रहरीलाई समेत मिलाउने जस्ता कार्य गरेको आरोप लागेको छ । यस्तो व्यवहारमाथि विभिन्न सञ्चार माध्यमहरूमा समेत प्रश्न उठ्दै आएका थिए । तर छानबिनका लागि आफ्ना दुई घुमुवा तानिएपछि पनि एसपी खड्काले पुनः लोक बहादुर कार्की नामक नयाँ घुमुवा परिचालन गरेको पाइएको छ । अब मुख्यालयले कार्कीलाई पनि छानबिनमा तान्ने कि नतान्ने भन्ने विषय चासोको विषय बनेको छ ।
स्रोतहरूका अनुसार एसपी खड्का यसअघि पर्सामा कार्यरत रहँदा पनि यस्तै किसिमका कार्यशैलीका कारण विवादमा आएका थिए ।तराईका सीमावर्ती जिल्लामा गैरकानुनी गतिविधि नियन्त्रण गर्न बनाइएको घुमुवा प्रणाली उल्टै असुलीको माध्यम बनेकोप्रति प्रहरी संगठन भित्रैबाट पनि गुनासाहरू बढेका छन् । मुख्यालयले यसपटक यस्ता गम्भीर गुनासामाथि कसरी कारबाही गर्छ भन्नेमा आम चासो रहेको छ ।
बिज्ञापन
